【A&M Diary】香港有好多唔同嘅旅遊景點，而香港旅遊發展局向外宣傳嘅旅遊片段，頭三名一定離不開太平山頂、維港夜景同位於大嶼山昂坪嘅天壇大佛。今日趁住好天氣，我同M佬坐昂坪360輕輕鬆鬆咁就嚟到喇！作為香港其中一個最重要嘅旅遊景點，天壇大佛嘅魅力之處又係咩呢？
天壇大佛座落於海拔520米嘅香港大嶼山寶蓮寺前木魚峰上，由207塊銅片組成（佛身165塊、蓮花36塊、雲頭6塊），高26.4米，連同蓮花座同基座總高約34米，重250公噸，耗資超過HK$6,000萬建成。係世界上僅次於佛光大佛嘅第二大戶外青銅座佛。於1990年動工，用咗3年幾嘅時間，至1993年12月29日開光同開放。仲記得我細細個嗰時，公公婆婆帶埋我同表妹，坐船去到梅窩再轉車嚟到，當年已經覺得好威喇！
天壇大佛設計參考北京天壇祈年殿天壇嘅地基，所以名為「天壇大佛」。
如果想親臨大佛跟前，就要先行268級樓梯。行完268級樓梯，除咗天壇大佛，旁邊就有六天母，手持六種供品，包括花、香、燈、澄、果、樂，以表對彿陀嘅敬意。
而天壇大佛內，分為三層：功德堂、法界堂及紀念堂。
功德堂：供奉一尊以楠木雕成的地藏王菩薩
法界堂：內設佛教書畫展
紀念堂：供奉佛陀真身舍利
不過，內部就無得影相喇。
