【A&M Diary】今個weekend終於陽光普照喇！M佬話要出去呼吸下新鮮空氣，順便帶埋我同二奶（佢部座駕）四圍去！由屋企出發途經青馬大橋，嚟到香港迪士尼樂園！今日我哋就唔係玩機動遊戲，主要去咗迪欣湖活動中心同迪士尼碼頭行下同影相打卡。
迪欣湖活動中心
迪欣湖活動中心喺2005年8月16日正式開放，比主題樂園早咗差唔多一個月啟用。為咗配合香港迪士尼樂園主題，所以呢度嘅欄杆都有米奇老鼠圖案。
迪欣湖
面積達12公頃嘅人造蓄水池，最深處約7米，係全港最大嘅人造蓄水池，正中間就係人造噴泉，多達12種嘅隨機變化。喺湖嘅唔同位置，仲種植咗荷花同紅睡蓮等水生植物。另外，仲有一條人造瀑布。迪欣湖除咗有觀賞用途，更加係提供水源畀竹篙灣發展區，以及迪士尼樂園作灌溉之用。
植物園
植物園種有超過一千棵植物，包括果樹、玫瑰等植物。其中鎮園之寶就係原植於財利船廠嘅假菩提樹，其樹冠逾20米、高達8米、重180噸。
兒童遊樂場
兒童遊樂場當然深受小朋友歡迎，兒童遊玩設施鋪上安全地墊，夠晒安全。
緩跑徑
由服務中心出發，圍住人工湖一個圈，全長1,500米，沿途設有9個健身站、6個觀景亭同瀑布橋，好似去咗外國咁！
服務中心
服務中心嘅外型彷照舊式英倫風格，除咗便利店，更設有更衣室同儲物櫃，仲可以租架船仔或單車漫遊迪欣湖。
野餐
園內有好多草地，非常適合大家野餐，而便利店更加可以作為補給點。但大家記住要保持園內整潔呀！
迪士尼碼頭
離開迪欣湖，另一個成日俾人忽略嘅地方，就係以維多利亞風格設計嘅迪士尼碼頭。碼頭以復古典雅為裝飾，裝有懷舊吊扇、吊燈同長椅，當然唔少得米奇老鼠頭嘅欄杆裝飾。碼頭分為東同西大堂，其中位於東面碼頭嘅就係打卡熱點嘅復古燈塔，影相夠晒靚；而西面碼頭就背對着迪士尼樂園酒店，好多人鍾意喺度影結婚相㗎！
