【A&M Diary】有啲地方係揸車會比較方便，所以今個weekend自駕遊就去到屯門嘅盡頭：龍鼓灘！一個對於我哋陌生嘅地方，彷彿就好似去咗旅行咁。不過，龍鼓灘旁邊係發電廠同堆填區，所以呢個海灘，真係好污糟，絕對唔適合大家游水。入到嚟龍鼓灘，除咗BBQ之外，想搵間餐廳食啲嘢都好難，好彩呢度有一間天然士多，等我哋可以坐喺度享受呢個悠閒嘅假日。
葡撻
見到佢嘅餐牌話係人氣no.1，我哋都忍唔住叫咗一隻試吓。葡撻外層嘅酥皮真係超級鬆脆，蛋香又夠滑，仲唔係好甜，入到嚟真係要試吓！
豬扒包
除咗葡撻，呢度仲有豬扒包，唔知真係以為自己去咗澳門啊！豬扒包唔係用脆豬仔包，但反而啱晒我哋心水，一啖咬落去豬扒嘅油分出晒嚟，配上特製嘅醬汁、新鮮嘅蕃茄同生菜，好fresh好夾呀！
冬瓜茶
同出面你所認知嘅冬瓜茶唔一樣，佢冇用到黑糖，只係單靠冬瓜嘅甜味，仲加入咗薑，真係顛覆咗我哋對冬瓜茶嘅認知，味道就唔係好啱我哋啦，但應該係比較健康嘅家庭涼茶。
