【A&M Diary】A姐成日都話食埋呢餐之後，就要開始食少啲嘢，不過我又未真係見過佢食少咗嘢囉！今日食完個午餐，行左唔夠兩個鐘，佢又話肚餓啦喎，所以我哋就去搵餐廳食下午茶。嚟到尖沙咀半島中心，見到I Café嘅下午茶選擇都幾多，就入咗去試下。
M佬之選：全日早餐
呢個全日早餐份量十足，有蘑菇炒蛋、牛角包、薯餅、火腿、煙肉、司華力腸、薯餅、茄汁焗豆、扒茄、沙律菜。司華力腸煎到外面香脆；火腿同煙肉都好惹味；炒蛋香滑有蛋汁，仲有多款菇類，加少少鹽同黑椒，好惹味；牛角包非常鬆軟；薯餅新鮮炸起，黃金脆口。全日早餐再加餐飲，HK$60有找，真係好抵食！
A姐之選：皇袍鰻魚飯
原來皇袍鰻魚飯係滑蛋鰻魚飯，白飯上面鋪咗滑蛋，蛋味香濃，入口嫩滑，同鰻魚汁好夾！鰻魚份量都唔少，厚肉有口感，連餐飲，HK$50都唔洗。
