【A&M Diary】有啲嘢好似遙不可及，好似A姐明明係公主，我呢啲一介草民，本身嘅距離真係好遠（佢迫我咁講）。又好似法國菜咁，細細個時，覺得係王子同公主先食得起嘅菜式。但呢間位於灣仔嘅Odelice! 就由法籍老闆親力親為，主打中價嘅法國菜，所以我今日就帶A姐去試吓啦！
法國生蠔
店長推介，話今日嘅生蠔好靚好新鮮！所以我哋就叫咗4隻。雖然法國生蠔普遍偏細隻，但勝在夠鮮甜，我哋加咗少少檸檬汁，就已經食得出生蠔嘅鮮甜味。
Odelice!生牛肉他他
A姐話佢未識我嘅時候，有兩樣嘢係從未食過，分別係牛舌同他他。所以每次食他他，只要我撈好，再整埋比佢食，佢就覺得好sweet㗎喇！呢到嘅生牛肉他他，牛肉味好香好嫩，但就略嫌個包唔夠脆。
蒜香白酒大蜆煮意粉
嚟到就已經聞到白酒嘅香味，但更吸引係每一粒嘅大蜆都漲卜卜，好肥美。加上蒜蓉炒嘅闊條麵，掛汁一流，仲夠晒香。
