【A&M Diary】原來foodcourt都有好嘢食！位於東涌大食代嘅意大利角落，由意大利主廚主理，主打手工現製意大利粉，仲有唔少特色意大利菜式，出品充滿誠意，但價錢卻係貼地嘅foodcourt價錢。難怪人氣極高，巔峰時候更加需要攞籌排隊呢，意大利角落絕對係大食代嘅名牌之選。
意大利角落：炸魷魚圈配他他醬
即叫即炸嘅魷魚圈，炸到金黃色，外層薄而酥脆，內裡彈牙軟嫩，沾上他他醬更惹味。
意大利角落：小牛肉配吞拿魚醬
外表平平無奇嘅小牛肉，原來混合吞拿魚醬同刺山柑後，帶出酸酸甜甜嘅味道之餘，仲增加軟滑嘅小牛肉口感，而且牛味香濃，驚喜而開胃。
意大利角落：薩拉米披薩
即叫即焗嘅Pizza就係新鮮！厚薄適中嘅餅底上面舖滿厚厚嘅馬蘇里拉芝士同大量薩拉米香腸，啖啖都係辣薩拉米腸嘅鹹香同芝士嘅奶香味，仲可以拉絲添呢！
意大利角落：意式香腸肉醬薯仔麵團
手工意粉可揀意粉、扁意粉、寛扁意粉、孖辮意粉、捲捲麵、薯仔麵團。其中薯仔麵團呈橢圓形嘅外形，軟綿綿嘅質感；醬汁以濃稠嘅肉醬與滿瀉嘅蕃茄味為主，加上香草嘅加持，味道酸中帶甜，而麵團充分吸收晒醬汁嘅味道同肉汁，非常惹味。
