【A&M Diary】去旅行就梗係要早機去晚機返，玩足咁多日，大假先唔會嘥。但自從開關之後，啲大假眨吓眼就用晒，剩返一日大假，決定一早去東涌行outlet，午餐食主打越泰東南亞菜嘅Mint & Basil，之後睇吓飛機，自製早機去晚機返嘅一日行程。
泰式柚子鮮蝦沙律
泰式嘅前菜代表，就係泰式柚子鮮蝦沙律。微酸嘅柚子沙律正好趕走近排天氣悶熱所帶嚟嘅鬱悶。柚子份量非常多，加上爽甜嘅鮮蝦，係非常好嘅醒胃菜呀。
越式軟殼蟹米紙卷
至於越式嘅代表，就叫咗越式軟殼蟹米紙卷。軟殼蟹口感爽脆，除咗生菜、牛油果、甘筍同青瓜之外，仲特別加入蟹籽，口感非常豐富。至於餐廳特別配上用山葵為基調嘅蛋黃醬，爽脆嘅配料遇上味道甜甜辣辣嘅醬料，味道帶有少少刺激。
串燒沙爹
6串嘅串燒有齊雞肉、豬肉同牛肉，每款串燒都有兩串，唔洗左揀右揀！充滿肉汁嘅串燒沾上帶有花生味嘅沙嗲醬，夠晒惹味。
泰式辣椒膏炒蜆
一如上面幾款菜式餐廳嘅餸菜都係令人滿足嘅份量，除咗主角蜆之外，仲有洋蔥同彩椒。蜆肉新鮮，而且又甜又大粒，而洋蔥同彩椒則吸收曬炒蜆嘅鮮味。加上惹味嘅辣椒膏，令人食唔停口呀！
Yellow Sky
天氣咁熱，又點可以唔叫番杯特飲解渴呢。
