【A&M Diary】食點心唔再係早茶嘅專利！喺勞碌嘅工作過後，一壺清茶配上熱辣辣嘅精緻點心，就係嗰種啱啱好嘅溫度配上熟悉嘅味道，讓你細味悠然自得嘅愜意時光。推介位於太子嘅籠太子點心專門店，餐廳由大師級主理，開到凌晨時段，時刻都能享受專屬嘅深夜微醺時光！
籠太子點心專門店：鮮蝦燒賣皇
食點心又點可以無燒賣呢！籠太子點心專門店嘅燒賣勁多蟹籽，而由於蝦同豬肉嘅比例啱啱好，除咗爽口彈牙，油香令燒賣唔會乾掙掙，夠驚喜。
籠太子點心專門店：籠太子蝦餃皇
夜晚唔想食得太多，燒賣同蝦餃都可以叫2粒架！籠太子點心專門店嘅蝦餃皮薄，晶瑩剔透，蝦肉彈牙，好新鮮呀！
籠太子點心專門店：鮮蝦菜苗餃
燒賣同蝦餃好似係點心界嘅大佬，而經常被遺忘嘅鮮蝦菜苗餃，其實往往係最令人驚喜！籠太子點心專門店嘅鮮蝦菜苗餃，由菜苗嘅清新襯托鮮蝦嘅鮮甜，結果就係最佳組合！
籠太子點心專門店：黑椒金錢肚
黑椒味道香濃，金錢肚夠晒入味，口感軟腍；而墊底用上烏冬？其實索晒所有精華，非常香口！不過，就略嫌份量較少。
籠太子點心專門店：雪山叉燒包
雪白色嘅雪山夠晒香脆，而麵包蓬鬆柔軟；入面叉燒嘅份量十足而且香甜，口感一流！
