【Now新聞台】截至早上11點，1小時內《彭博》用戶關注度上升最多嘅港股，依次為恒大物業、聯想集團、恒大汽車、藥明生物、中國恒大。
今日排行榜5隻股份3隻屬於恒大系，其中恒大及恒大物業今朝開市前宣布停牌，有消息話，同樣今朝停牌嘅合生創展會向恒大購入恒大物業約51%股權，交易額或超過400億港元，以恒大物業停牌前市值約550億元計，若傳聞係真就有好大溢價。
圓通環球金融集團行政總裁曾永堅指，睇返合生創展出嘅通告，停牌係因為等緊一單交易，收購一間喺聯交所上市嘅公司，雖然冇畫公仔畫出腸，但市場見到恒大物業停牌，喺咁吻合嘅情況下，自然會聯想到係咪同恒大物業有關，依家就咁睇，主角係恒大物業嘅機會都幾大，但交易作價就有待公布。
