【Now新聞台】截至早上11點，1小時內彭博用戶關注度上升最多的港股，依次為九龍倉置業、旭輝控股、富力地產、萬科企業、聯想集團 。
九置係今朝3大升幅藍籌之一，股價一度升逾4.7%，高見40.85元，其後升幅收窄，會唔會同憧憬中港通關有關？因為廣東省會喺10月11日起，試行恢復赴港嘅商務簽注。
寶鉅證券董事及首席投資總監黃敏碩指，應該都有一定關係，而九置本身係收租成分較大，如果睇返集團咁多瓣業務，唯一酒店業務係比較難搞，但只要商場及寫字樓可以做返好，會令整體恢復得更好。佢又話，九置股價之前跌得過殘，作為收租股，相信反彈力度會比純地產股大。
