【Now新聞台】截至早上11點，1小時內《彭博》用戶關注度上升最多的港股依次為：舜宇光學科技、華潤啤酒、福萊特玻璃、信義光能、中芯國際。
舜宇今日冇特別利淡消息，但半日跌逾4%，報176.3元，暫時係跌幅最大藍籌。值得留意係，北水噚日狂沽舜宇，走資1.91億元。
大華繼顯執行董事梁偉源認為，北水狂沽舜宇，係因為預期半導體供應短缺，會拖低未來2季手機出貨量，所以睇淡手機設備股。
睇返技術走勢，舜宇星期三失守100天線後走勢轉差。梁偉源估計，舜宇短期好大機會失守250天線，即153.6元後先有支持。
