【Now新聞台】截至早上11點，1小時內《彭博》用戶關注度上升最多港股，依次為紫金礦業、江西銅業、中國宏橋、中國鋁業及中國石油。今日上榜嘅5隻都係資源股，全部都跑贏大市，頭兩位同銅相關，期銅價格早前衝穿每噸10000美元，逼近紀錄高位後，最新繼續喺高位徘徊，美銀發報告指，面對銅庫存處於15年低位，未來數月銅價或升至13000美元。
京華山一國際研究部主管彭偉新指，喺經濟及政策層面上，銅供應增長不及需求增長，出現失衡狀況，佢估計，銅價有機會升至13000美元水平，但見20000美元機會唔大。佢又話，由於現時股市相對較貴，導致新資金減少投入股市，轉戰商品市場。
