【Now新聞台】截至早上11點，1小時内《彭博》用戶關注度上升最多港股，依次為快手、吉利汽車、太古地產、美高梅中國同九龍倉置業。
快手公布上市後首份業績，舊年勁蝕過千億，大部分同優先股公允值變動有關。雖然券商力撐，指快手舊年第四季表現唔差，仍睇好直播、廣告以至電子商貿吸金能力。不過，市場似乎唔收貨，快手股價今日插水。
安山資本資產管理部董事黃志陽指，雖然快手收入增長50%以上，但蝕過千億，可能投資者覺得業績唔算超靚仔，加上大市回調，捱沽係無可厚非。佢又話，市場認爲快手估值偏貴，公司未來嘅數據，必須睇到直播、廣告增長快，先可以支持到股價。
