【Now新聞台】截至早上11點，1小時內《彭博》用戶關注度上升最多的港股，依次為新奧能源、思摩爾國際、信達生物、吉利汽車 、康師傅控股。
排首位嘅新奧舊年賺多咗，上市20周年又派特別息，瑞信近一年都畀「跑贏大市」評級，但指估值偏高，所以降評級至「中性」。新奧股價之前十連升，今日曾經跌超過10%，有機會錄得兩年半以嚟最大單日跌幅。
京華山一國際研究部主管彭偉新認同，新奧市盈率(PE)相對較高，睇返之前嘅走勢，出完業績後，如果股價上返2月高位，即130元樓上，投資者可以考慮短線先食糊。佢又話，燃氣股前景唔差，因爲各地都重視「碳中和」，清潔能源能受惠於國策，對新奧絕對有利。
