【Now新聞台】截至早上11時止，《彭博》系統Top search No.1 為北京汽車、中國鐵塔、中國鋁業、洛陽鉬業及融創中國。
汽車股係上星期搜尋榜常客，今日繼續見到身影，之前提到嘅利好因素主要係庫存回落，以及內地將會推出一系列措施推動汽車消費增長，北汽股價連升第五日，華晨中國連升到第七日，長城汽車更連升到第八日，相當強勢。
對於北汽股價近期升勢較其他汽車股弱，耀才證券研究部總監植耀輝表示，華晨等汽車股早前股價回調幅度較大，所以當大市反彈時，呢啲較「殘」嘅股份反彈幅度亦都較大，但從消息面去睇，北汽有較多利好消息，例如早前有傳平治母企會增持北汽合營等。
