【Viu】MIRROR 「FING 小組」噚日出咗新歌《BRO!》，今次走R&B味嘅抒情慢歌曲風，Lokman解釋：「原故事就係我覺得我哋四個好似網上一啲Meme 圖，男人叫啤酒唔使講嘢，個Bartender 望一望指一指，你同班friend點個頭就可以叫到啤酒。」深度還原男人之間「唔使多講、有事即到」嘅兄弟情！AK指四人最深刻感動嘅「Bro事」：「好似MIRROR又好，或者我哋四人嘅騷、綵排後返酒店嘅聚會，好屬於我哋四個嘅時間，好似一齊完咗一件事後食飯傾偈，係好Bro同維繫感情嘅方法。」
德仔更被AK賜名「王海豚Dolphin Wong」，本尊笑認：「作為第一個入錄音室，喺冇前人提示下，唱到嗰個高音位，突然『師傅到』夾硬衝咗上去，雖然唔知點收科，但當時錄音室氣氛非常好！我第一個玩，後面第二、三、四個就跟住一齊玩，最後都希望觀眾一齊玩。」令「海豚音」意外解鎖。拍MV當日，Frankie更疑似過度瞓身演出跳到爆褲，右大髀罅位爆開足足有成隻手掌咁大嘅窿添！三兄弟仲唔狂笑咩，場面失晒控！想知更多爆笑花絮，入嚟睇現場實況片啦！
