【Viu】MIRROR本年度第二首團歌《同往》已推出，由張繼聰作曲，鄭敏填詞，蘇道哲編曲兼監製。隊長Lokman表示：「新歌取名《同往》，英文歌名《Kizuna》，源自日文『絆』嘅意思，意指人與人之間切唔斷嘅情感關係，無論親情、友情定團隊之間，呢種連結超越咗空間與時間。」
Ian讚嘆副歌同和音部分係驚喜：「溫柔而堅定地宣告縱使未來前路或會分岔，甚至喺星海中幾經失重，只要12顆星體再凝聚，就能抵抗黑洞，跨越最闊嘅星海。」
為配合新歌主題，MIRROR藉拍MV結伴「同往」一日Camping之旅，12子齊齊同陽光玩遊戲、傾心事，Edan表示：「大家一齊玩樂、一齊準備營火派對，過程愉快，同時提醒大家要珍惜當下！回望過去高低起伏，無論係瘋癲壯舉與憂鬱堡壘，未來嘅事雖然冇人能預知，但最重要係沿途高低同往。」
「忙內」Tiger直言最難忘係出道記者會：「嗰張相紀錄大家跳完舞嘅End Pose，相當經典，大家當時充滿熱誠，跳得十分投入。」Alton就憶起剛出道嘅蝦碌趣事：「有次我哋去澳門為周年晚宴表演，嗰次無論喺安排上、行程上，都有一種無法控制嘅感覺。」
至於AK、姜濤、Anson Lo同Jer就難忘拍攝團綜嘅點滴，姜Admin話：「最記得大家一齊到梅窩拍《調教你MIRROR》，我哋對團隊前路比較迷惘，後來就化解咗MIRROR之間嘅誤會同不快。」Anson Lo認為12子赴澳洲拍5周年團綜《MIRROR Time》係最珍貴：「記得喺澳洲拍攝時，除咗玩遊戲，大家有時間傾心事。」
Jer又表示：「其實登上熱氣球前，同一班兄弟坐上去，印象深刻，亦好回味。」AK最難忘係喺塔斯曼尼亞嘅一夜：「收工後同隊友行返營地，齊齊抬頭睇美麗銀河，一齊創造集體回憶。」Frankie、Stanley同Jeremy異口同聲指MIRROR演唱會係心中「魔幻時刻」，想知更多就睇現場實況片啦！
