【Viu】香港一代戲劇巨匠King Sir鍾景輝上月3日逝世，享壽89歲。「戲劇大師鍾景輝追思會」今日喺演藝學院舉行，現場派發King Sir明信片及場刊，場刊內除記載King Sir生平，帶病上台致詞嘅杜琪峯、蔡和平、謝君豪等撰文悼念。追思會約傍晚時份結束，一眾來賓陸續離開，包括杜琪峯、李司棋、盧宛茵、黃真真、姜大衛等，高徒張達明連人帶輪椅上的士離開。
陳國邦同老婆羅敏莊一同離開，受訪自封係最幸運嘅一位學生，因為有7、8年時間，同King Sir手把手走訪多地演出舞台劇《相約星期二》，令其他學生不知幾咁羨慕！陳國邦又話依家延續King Sir薪火，成為老師教語言戲劇。
喺追思會上，陳國邦同一眾同學、學生演出《小城風光》，中間穿插同King Sir之間嘅相處，問到會唔會係從影以嚟最大壓力嘅一次演出？感性嘅陳國邦一秒淚崩，要老婆羅敏莊幫手接話，指King Sir同學生感情如仔女，爆老公知道King Sir離世當刻立即崩潰。訪問最後陳國邦更扮演King Sir，二次創作台詞悼恩師。黃秋生則封King Sir為恩人，睇重佢又對佢好好，更曾助佢補考畢業！佢又話喺啱啱個追思會上有感動落淚，憶起同King Sir之間數之不盡嘅難忘事。問到有冇關心張達明健康？佢指有一直約食飯！
另外，追思會以《小城風光》為引子，將King Sir生平與往事點滴以戲劇形式呈現，並由King Sir嘅姪兒鍾至權先生代表家屬致辭，著名導演杜琪峰、香港話劇團桂冠導演毛俊輝及資深演藝人張寶之等先後上台分享King Sir往事點滴，最後一眾King Sir學生帶領一眾嘉賓合唱經典金曲《My Way》，追思會便在眾好友及學生向King Sir講多謝嘅片段中結束，當中包括周潤發、劉德華、古天樂、汪明荃、羅家英等都有拍片。
