【Viu】古天樂今日黑超look驚喜現身撐導演Sunny陳詠燊做策展人、張蚊任美術總監嘅「拍住上—光影裡並肩馳騁的我們」展覽開幕酒會。展覽向8套經典電影致敬，包括《最佳拍檔》，Sunny導演更獲偶像許冠傑拍片親唱主題曲《最佳拍檔》，感動到喺屋企哭咗！張蚊講到首執導拍長片《不得不好死》即獲歌神陳奕迅演出，又大讚柳應廷「叻」，仲爆Jer對住偶像Eason有啲緊張添！下個目標希望兩位唱得之人合唱埋主題曲啦！
林明禎、趙善恆@ToNick亦專程嚟撐Sunny導演，明禎即場恭喜早前喺美國拉斯維加斯娶老婆嘅恆仔，佢話都係睇post先知，又「order」恆仔打邊爐補擺酒，仲拍心口會封大利是添！恆仔就話低調結婚係想chill啲，儀式、影相、連紋身婚戒一個下晝就完成。兩公婆互相幫對方紋婚戒上手，恆仔又笑稱被紋身時表面笑緊但其實痛到爭啲整爛張凳，笑C！
好耐冇見嘅大導演唐季禮激罕現身，唐導回憶同成龍大哥拍《警察故事4之簡單任務》時，為拍攝一齊學潛水，佢上水時嘔，緊隨嘅大哥不幸「食晒」，OMG！唐導又分享多年前同奧斯卡影后楊紫瓊拍戲，Michelle見佢斯文即整蠱，「老屈」唐導摸pat pat，兩人自此成為老best。唐導又透露年底會回歸香港拍港產片，想知就睇訪問片先啦！
