賀歲片《夜王》今日全員再出宣傳活動！「歡哥」黃子華同「V姐」Sammi鄭秀文，率王丹妮、廖子妤、盧鎮業、「阿卵」楊偉倫、Dee@ERROR、Renci楊偲泳、Mandy譚旻萱、芯駖@COLLAR、Hazel林熙彤等，去到中環同50位「老細」猜枚，Renci意外成「東日枚后」，真係估佢唔到！而Sammi最後更宣布《夜王》會喺2月14日情人節有優先場！
講到票房數字，子華神話唔敢亂立flag喎，Sammi又點睇？時下興網上宣傳，喺IG、Threads同網民互動，唔知子華神又會唔會開返個account呢？除咗《夜王》之外，賀歲片群組仲有《金多寶》、《鏢人》等，子華神揚言之間冇競爭，全部都會支持、新年要睇晒佢！
Sammi為《夜王》重編《星秀傳說》做主題曲，搵嚟阿Dee、阿卵擔任rapper，喺IG post MV花絮相嗰陣，有網民將阿卵認錯做許志安，Sammi大笑話平時都冇乜點覺得，但畀網民講完之後就覺有幾分相似，仲越睇越覺得靚仔，不禁高呼：「人言可畏！」更有同安仔講呢件事添，唔知當事人又點睇？另外，Sammi話見有cantopop disco播佢啲經典歌，會唔會有機會拉埋成班東日美女去踩場？想知就要睇足本訪問！
