【Viu】資深演員「Benz雄」許紹雄上月28日因腎癌引發器官多重機能衰竭離世，享壽八十有餘歲。許紹雄治喪處定於今日假大圍寶福紀念館地下寶福堂設靈，聽日上午舉行大殮儀式後出殯，靈柩隨後奉移火化。
許紹雄女兒許惠菁喺下午3時半接受訪問，直言一直以爸爸為榮，仲話應承咗爸爸會代佢照顧媽咪同屋企人，亦秉承爸爸盡責嘅優點，事關爸爸分享過當年拍《新紮師兄》嗰陣，先後經歷爺爺、嫲嫲同姐夫離世，為咗唔影響拍攝進度同麻煩到同事，冇停過一日廠，所以自己會記住爸爸嘅教誨，辦完後事就會全情投入工作。佢又話爸爸嘅社交網站唔會關閉，之後亦會繼續更新，等爸爸嘅開心形象永留大家心中。
雖然避談病情轉差經過，許惠菁坦言爸爸離開得好突然，自己同媽咪仍難接受事實，只希望喪禮嘅安排符合爸爸低調個性。問到未能畀爸爸抱孫，會唔會有遺憾？許惠菁即感觸落淚話：「呢個的確係一個遺憾，爸爸照顧我咁多年，遺憾唔夠時間畀我孝順佢。」聽者心酸。
靈堂以簡潔為主，喪禮以佛教儀式進行。中央放有許紹雄面帶微笑的彩色遺照，橫扁寫上「永遠懷念」四字，而遺照前方則放有愛妻龍嬿而（暱稱：鳳子）、女兒許惠菁與女婿元晏、繼子俊貽與媳婦樂琳及孫Aurelia，三個心形花圈，契女佘詩曼致送花圈同放於旁。靈堂內掛上寫有「昊靝罔極」的祭文布，下款寫著繼子俊貽與媳婦樂琳泣血。另外，堂內還放有4部電視不停播放許紹雄生前的影視作品、攞獎片及生活照。
許紹雄生前人緣甚廣，契女佘詩曼、黃子華、譚俊彥、黃宗澤、邱禮濤導演、麥長青等親身到場弔唁，也獲多位圈中好友致送花圈悼念，包括周潤發、曾志偉、黃子華、劉德華、吳君如、劉青雲與太太郭藹明、陳小春與太太應采兒、苗僑偉與太太戚美珍、任達華、羅嘉良夫婦、JJ林俊傑、邵美琪、薛家燕、鄭少秋、鄭則士與太太林燕明、黃浩然與太太莫家嘉、方平與太太鮑起靜、王晶、吳卓羲、陳妙瑛、王祖藍與太太李亞男等。
靈堂外則擺了宣萱、古天樂、鄭裕玲、香港演藝人協會、余安安、任達華、關菊英、姜皓文與太太殷寧、成龍、周勵淇、錢嘉樂、苑瓊丹、吳彥祖、蘇永康、林峯、曹永廉與太太姜依蘭、樊亦敏、袁潔瑩、陳山聰、車婉婉、林小明、胡杏兒、肥媽、黑妹等的花圈，如一片花海。
