【Viu】「Benz雄」許紹雄縱橫影視界逾50年，拍過多套膾炙人口嘅劇集同電影，合作過圈中好友多如繁星，今日不少好友專誠到靈堂致祭，除咗佘詩曼、黃子華及黃宗澤等外，仲有杜琪峯導演同太太黃寶玲、張家輝、苗僑偉（三哥）同戚美珍、黃日華、黎耀祥、黃浩然等。
其中曾經去醫院探望Benz雄嘅三哥透露，對上一次見面就係嚿年去對方屋企食飯，又話Benz雄一直密封病情，直至許太早排通知佢去醫院探病時，先知道Benz雄已經病重昏迷，處於彌留階段，凌晨時份已離世。
由於事出突然，三哥坦言好心痛，仲哽咽話：「識咗40幾年，細個喺訓練班出嚟好錫我哋，同佢開工好開心，太多回憶，好心痛！」三哥又爆當年仍然係𡃁仔，唔敢坐Benz雄架Benz嘅逸事。
再問到知唔知Benz雄有咩心願未了？三哥就話好友為人瀟灑，凡事都睇得通透：「佢冇乜唔開心，連自己病都冇同我哋講，冇人知，當我知道佢嗰日彌留先去見佢，好遺憾、好心痛！」三哥又慨嘆老友走得太快，好應該享受多幾年家庭樂，相當可惜！
至於張家輝就話原本收到朋友通知Benz雄病重消息，奈何當日趕唔切去醫院見最後一面，慨嘆香港影視圈失去咗一位好演員，事關Benz雄既能輔助主角，又可以自己搶戲，仲話：「呢啲演員買少見少！好難搵喇！」家輝哥又大讚Benz雄係片場開心果，轉數快、反應靈活，過往嘅合作都好舒服！
