【Viu】繼續送上903籃球賽現場賽況！去到中段係女子籃球賽時段，九零三人隊、歌星勇士隊分別派女將出場，秒令籃球場充滿住仙氣！而旁述方面就轉由兩隊隊長張繼聰、森美擔任，喪放笑彈，精彩度跟球賽有得揮！
歌星勇士隊率先上場嘅有籃球女神Mandy譚旻萱、JACE陳凱詠、Nancy Kwai、Cloud雲浩影、Cath黃妍，Mandy跳高起手搶波後即入2球，女神係無敵㗎！
隨後歌星隊換咗Moon Tang、kayan9896、張蔓莎、張蔓姿上場，而DJ隊亦換上今日正日生日嘅小儀落場，旁述森美、阿聰起勢祝小儀生日快樂，鬼馬大叫小儀做「2蚊儀」，又係咁叫DJ隊其他成員唔好傳波畀佢，特別係謝茜嘉，因為存有身高差，真係好抵死！只見小儀扮乜都聽唔到，出盡奶力搶波起手，但都未能攞分！
另一邊廂，阿正靚傳畀Elsie成功攞分，Bad Girl佬萬歲，阿正不敢相信自己神助攻，O晒嘴！呢一節最後一球波交由籃球女神Mandy靚射追分，但歌星隊總分仍以21:37落後！
