【Viu】「凍齡男神」鄭伊健出道38年首度踏足台灣高雄舉行演唱會，日前喺高雄巨蛋舉行《Here & Now 鄭伊健演唱會2024》，伊健特別為當地歌迷打造專屬國語歌單，演唱國語歌《至少還有我》、《蟲兒飛》同埋《老友萬歲》。佢更邀請婁峻碩、陳零九、黃偉晉、小賴賴晏駒組成「古惑版五堅情」，合唱廣東歌《戰無不勝》同埋《興波作浪》，佢哋著上皮褸「古惑look」亮相，婁峻碩表示同伊健三年前合作拍劇認識，之後又喺綜藝節目《娛樂百分百》玩講廣東話遊戲，非常難忘！伊健亦指好開心同佢哋一齊，之前喺節目上玩好輕鬆，所以邀請五堅情做嘉賓。婁峻碩得戚話：「我們是被（伊健）認可的！」伊健豪氣話：「有機會來銅鑼灣找我！」
伊健之後以限定版組合「Cup Noodles」出場，佢以國語介紹當中兩位歌手，一位係香港嘅音樂人朱雋言，另一位係 「寰亞孻女」Feanna黃淑蔓。伊健搞笑話：「她是我們公司的藝人，她本身很胖，現在瘦了，所以我給她機會在台上唱歌。」Feanna獨唱「F.I.R.飛兒樂團」嘅作品《我們的愛》，獲得全場掌聲！
演唱會期間全場歌迷高舉手幅「友情歲月 有你便有我」，最初伊健睇唔清楚文字，太太蒙嘉慧就拎住手幅，從觀眾席跑去台前俾佢睇，場面搞笑！完騷後，伊健笑言用盡力表演，把聲沙到講唔到嘢，舉起一張佢表情感動嘅相片，代表心聲。佢仲透露同五堅情表演時，唔小心被支咪撞到牙流血，好彩最後都無事！
