【Viu】林峯 x 鄧麗欣 x 張繼聰嘅拉闊騷今晚喺亞博舉行，家屬團方面除咗有Kay謝安琪帶埋囡囡Kakaball之外，仲有Stephy嘅台籍男友Bryan戴口罩低調坐喺「未來外母」鄧媽媽隔離，喺開騷前又向Stephy好姊妹Miki送上樽裝水，超貼心呀！每次當Stephy喺台上演唱嗰陣，Bryan都9秒9拎起部電話拍片，既係男友、更係忠實fans！
Chok爆出場嘅阿峯、Stephy、阿聰，打頭陣先帶嚟一段快歌Medley 《Chok》x《派對動物》x《Every Single Time》x《Let’s Get Wet》，一秒撻着所有人嘅hyper mode，尖叫聲不斷！睇完呢part就發覺「Sexy」唔單止可以用嚟形容Stephy，見阿聰、阿峯出盡奶力喪扭，大晒婀娜多姿嘅舞姿都勁sexy，兩位確係好腰好腎好男人呀！
之後三人各自帶嚟solo作品，換上一條超貼身、Deep U長裙嘅Stephy演唱新歌《立斷》；林峯帶埋城寨巴打「十二少」胡子彤encore跳唱《Chok》，子彤起勢咁震動胸肌，畫面勁養眼；「愛妻號」阿聰就揀咗老婆Kay首《50/50》嚟cover，唱到中段風騷派心，大銀幕亦影住坐台下嘅Kay冧爆跟唱，會唔會太sweet？
緊接就有小組crossover，阿峯x阿聰背對背合唱《用背脊唱情歌》，兩位男神不忘喺music break互送心心，認真痴纏呀！臨尾阿聰更追加咗「令山轉」，真係畀佢笑死！
去到talk位，阿峯再次親證電影《尋秦記》並唔係都市傳說，即將會同大家見面！阿聰抵死劇透就係拍呢套戲見識到「秦始皇」奔跑，真係siu 4！最後佢哋以《心急人上》作結，high至完騷！另外，嚟睇騷嘅仲有胡楓、黃淑儀、炎連輝，Lolly Talk嘅Tania、Ah Yo、Yanny、Elka、Mei Mei！
