【Viu】相識滿天下嘅Kenny關智斌，嚟到啟德騷頭場嘅下半part，嘉賓s曬冷現身，有相識20年嘅Fiona薛凱琪，不得不說，Fiona堅係夠雷，喺北京開緊巡唱都專登返一返嚟香港，完成做嘉賓呢個任務就要即刻飛走，真係「斌斌」波波啦！
Kenny先同Fiona合唱《南昌街王子》，之後再自肥request Fiona唱《奇洛李維斯回信》畀佢聽！二人喺chit chat環節更喪爆料，除咗互爆真實年齡之外，Fiona爆曾經同Kenny撐過一次枱腳，閒談中仲以為Kenny想追佢添！佢哋到底傾咗啲咩？Kenny係咪真係想追Fiona？
另外，Kenny逢開騷都有個傳統，就係老BEST「龍虎豹」Joey、阿Sa、阿嬌必定衝上台反轉個舞台，當然呢次亦唔意外，事關阿Sa一早已經自爆再有呢個計劃！最終「龍虎豹」喺encore環節登場，同Kenny合唱《死性不改》，全場超勁hyper！唱唱吓，Joey無預警爆喊，攬實Kenny求安慰，未知Joey呢次有冇受酒精影響？
「龍虎豹」喺chit chat環節陷入瘋狂自high狀態，其中阿Sa猛咁話想試玩頸圈兼喪叫好姊妹摸Kenny「實的的」嘅肌肉，Joey仲揚言要喺Kenny身上摷「喉糖」，又形容對方「乜都長」，少少咸多多趣！而好耐冇喺香港公開露面嘅阿嬌，不忘發揮佢自身本領爆金句！最後喺一輪we嘩鬼叫後，阿Sa自薦想陪埋Kenny唱last song，Kenny又點會托手踭？四人合唱《眼紅館》為呢晚演出畫上完美句號！
