【Viu】Twins年頭喺香港完成14場紅館騷後，前晚就喺佛山完成咗第13場內地巡迴演唱會，由於係內地的尾場，歌迷由第一首歌開始就企晒起身跟全Twins又跳又唱，直到散場都唔肯坐低，仲有人扮古裝、扮小丑爆炸頭，好熱鬧！
阿嬌一開始已經被感動感動到眼濕濕，佢坦言：「嘩，咩事，一出嚟就已經想喊。」當唱到連串經典金曲時，Twins都被歌迷大合唱歌聲感動到眼濕濕幾次，到完場時，兩人再忍唔住淚水，到大合唱《風箏與風》時，都被感動得不斷抹眼淚，唔捨得咁同歌迷揮手暫別！
除咗有感動嘅淚水之外，都有驚喜又開心嘅場面，就係阿嬌向阿Sa送上生日驚喜，為佢印好全場「蔡卓妍生日快樂」橫幅，後來仲請萬多位觀眾高舉生日牌，為阿SA高唱中文版生日歌！阿Sa收到驚喜後好感動：「嘩，咁早慶祝生日......好感動，我爸爸同埋我隻貓，都係就快生日，佢兩個都係10月23號生日，咁大家不如送俾個祝福比佢地啦，我爸爸坐係邊呀？生日快樂呀。」
阿Sa十分多謝歌迷陪住佢哋不斷打破Twins演唱會紀錄，不經不覺巡到第27場，走過呢段巡唱日子其實唔容易，每星期要去唔同地方演出，有好多難忘事，今次內地巡唱之後，Twins會先小休一下，之後向北美、加拿大、倫敦等地進發！至於Twins去到英國會唔會約Wyman見下面？阿SA笑言：「佢對『多謝失禁』，『愛情當入土』好有興趣，哈哈，見面一定同佢踱下。」阿嬌就話聖誕節會喺英國過，都係第一次，所以演唱會上，會諗下係咪有個聖誕特別版演出，「海外場冇依家咁大，同觀眾距離好近，應該會更加開心，或者可以叫佢地再扮返Twins 造形入場，或者扮聖誕樹，我哋可以揀最佳衣著，著得勁嗰個一樣有大獎！」
