【Viu】 Twins一連14場《TWINS SPIRIT SINCE 2001 LIVE IN HONG KONG》紅館演唱會昨晚開鑼，阿Sa蔡卓妍同埋阿嬌鍾欣潼先以全身粉紅色裝扮登場，Opening嘅快歌 Medley，唱出一系列經典代表作，包括《明愛暗戀補習社》、《愛情當入樽》同《ICHIBAN興奮》等，唱到《跅跅步哈姆太郎》時重現初出道招牌側手翻動作，係回憶剎呀！
Twins出道22年，阿Sa表示有好多個奇蹟，每次企埋一齊，就好似返返年青時，冇老過咁！阿Sa： 「我哋可能係傳說之中嘅不老之藥，哈哈...依家有得望就望多幾眼啦，係咪即刻覺得自己回春呢？哈哈哈。」
全場大合唱《下一站天后》之後，二人分別喺台上講出感謝對方嘅說話，阿嬌直認由細到大都好冇自信，好多時遇困難會逃避，好彩有阿Sa走出嚟幫佢解決同出頭，阿嬌抹住眼淚話：「我好幸運好感恩，可以遇見你，可以同你組成 Twins ，多謝你呀，蔡卓妍。」真係好有愛呀，連台下容祖兒都被佢哋感動偷偷抹淚，之後Twins唱《相愛22年》。
昨晚演唱會適逢係阿嬌43歲正日生日，阿Sa搵咗現場觀眾幫忙畀個驚喜阿嬌， 叫全場歌迷喺凳底拎起海報，砌出字樣向阿嬌講生日快樂兼唱生日歌，結果因為有歌迷向最前面衝，唔肯坐喺位，又有人將海報嘅顏色互相調亂，破壞晒阿Sa原本嘅計劃，冇辦法統一生日快樂字句畫面，想知阿Sa有幾嬲豬，而阿嬌收到呢份心意後有幾感動，記得入嚟睇片嘞！
