【Viu】黃修平導演、游學修、Marco吳祉昊同小演員鄭進希，今晚專誠到即將結業嘅旺角新寶戲院為《看我今天怎麼說》謝票，阿修同「Mini修」進希合體受訪笑爆全場，進希仲笑言有人話佢似阿修多過嗲哋，激到嗲哋嘔血咁滯，又直認希望大個好似阿修咁靚仔，最好啲女朋友都似「修女郎」咁靚啦！
當阿修透露那些年帶過女仔嚟呢度睇《喜愛夜蒲》時，進希雖然話唔係自己嘅年代，但年僅11歲嘅佢竟然爆Seed話好想夜蒲，可惜父母唔批准。進希笑認套戲出街後成為同學拎明星簽名嘅中介，亦鎖定咗金像獎嘅集郵同拎簽名名單，仲畀阿修踢爆早一個月已試定「金像髮型」，真係人細鬼大咯！
此外，黃修平導演直認係街坊，喺戲院留低唔少腳毛，當然唔捨得戲院結業，希望寒冬盡快過去。Marco就話連場謝票帶嚟好多反思，亦收穫好多戲迷嘅鼓勵，想知就睇足本訪問啦！
