【Viu】唱作歌手Moon Tang最近一次過宣布兩個好消息，分別就係推出首張個人大碟《25》兼5月開演唱會，各位fans開唔開心？surprise唔surprise先？咁啱開騷嘅日子就係定喺Moon門踏入26歲前兩個星期，故誠邀fans一齊嚟開party，見證佢嘅成長歷程！
大碟《25》係以少女日記方式唱出佢20-25歲期間自身、愛情嘅感受，點解Moon門會特別揀呢個time slot呢？私下真係有寫日記習慣嘅Moon門更大方share咗幾個小故事，包括係佢細個最引以為傲嘅moment、puppy love等，可以窺探到Moon門本日記呢個機會堅係超難得！至於講到佢喺呢段時間嘅低潮期，身為「線圖大師」嘅Moon門就畫咗幅線圖同大家詳細講解！
Moon門為宣傳大碟發起咗個「Small Talk」event，喺街隨機搵小朋友嚟答問題，原來背後係隱藏咗佢嘅「我的志願」，係咪估佢唔到呢？另外，談及愛情部分，眾所周知Moon門大約係年半前同Gareth. T分咗手，佢又點睇呢段感情？完咗呢段感情後佢又有咩改變？日前喺華納Family騷上，二人再合唱《Honest》呢首歌，佢有咩感受？即刻將時間交畀Moon門！
