【Viu】電訊盈科媒體今日喺香港國際影視展上，宣布推出全新皇牌劇集《THE SEASON》，由一眾國際知名演員主演，包括Jessie Mei Li、錢裕揚、Yvonne Chapman、盧靖姍、Toby Stephens，仲有影后林嘉欣、木村光希、李載允、Anson Lo@MIRROR、Marf@COLLAR、Lyman香胤宅、Thor駱振偉、Mishy李昭南參演，陣容鼎盛！
出道多年嘅嘉欣自爆今次係首拍電視劇，令佢首肯接拍原因係成個故事都圍繞香港！嘉欣笑話有三件事對佢係超大挑戰，就係喪背英文對白、鏡前着一件頭泳衣、仲有嘅就係拍歌舞場景！所以嘉欣急向「前輩」Anson Lo拜師，又搞笑話見到Lyman勁柔軟，佢都要開始拉定筋！
當Anson Lo聽到嘉欣嘅「求救」，笑話好耐冇教跳舞都好緊張，今次嘅學生仲要係影后級添，未知到時會唔會幫手排埋舞！撈撈劇透飾演表演者，主要係同嘉欣對戲，亦有機會上遊艇拍攝，唔知撈撈件泳衣係點㗎呢？
至於嘉欣就透露係演Toby Stephens嘅老婆，係一名闊太，使唔使借用Anson Lo啲橙色盒子？另外，教主啱啱喺韓國拍完小組團綜返港，高呼呢次出埠拍攝係最攰、最chur，直頭笑話諗返起都覺得攰添！究竟因咩事令教主咁疲憊？當中有咩趣事發生？談及有傳神徒享優先訂《CHILL CLUB》頒獎禮門票，教主直言係不實報道，戥神徒被誤會心痛！
