【Viu】向來走開朗「笑女」路線嘅Sica，喺台上剖白心聲，佢話8月對自己特別有意義，事關當年係8月參加《全民造星IV》，兩年後正式出歌做歌手都係8月，雖然當年參加《造星IV》嗰陣成日畀網友笑Kam，但其實好鍾意當時嘅自己，因為當時識得用正面嘅態度去面對失意。Sica表示因為觀眾鍾意自己開心，所以就算幾emo，只要一Roll機就要擺個開心樣出嚟，希望自己發放嘅正能量可以幫到人。
直至今年7月，呢種「死撐」終於爆煲，觸發點係因為喺劇集《島嶼協奏曲》嘅表現備受抨擊，令自信崩塌！Sica坦言當時無論做乜，都會有把聲同自己講：「你做唔到㗎！」搞到自己力不從心。呢個情況維持到舞台劇慶功宴當晚，終於因為梁祖堯一席話令佢茅塞頓開：「佢同我講無論如何都唔好放棄自己！」原來Sica放棄咗嘅正正係當初參加《造星IV》嘅自己，嗰個毫無顧忌曝露自己弱點、唔會逞強嘅自己。隨即送上新歌《紙飛機的迫降奇蹟》同《再見有時》作結。
