【Viu】《新城勁爆頒獎禮2024》記招今日舉行，有過百歌手出席，惟繼續冇華納歌手列席！以性感sporty look現身嘅Gin Lee李幸倪，率先獲頒「最佳衣着（女歌手）」獎，事後佢笑話有受寵若驚！佢又預告年尾會再有首新歌推出，真係超勤力呀！
講到Gin Lee入圍叱咤「我最喜愛的女歌手」最後10強，佢搞笑話喺拉票方面就比唔上軒公同fans睇相，不過佢都好有創意咁話可以擺檔同fans做一件事！Gin Lee又表示年尾有好多騷要參與，咁聖誕節咪同唔到男朋友過囉？會唔會被詐型㗎？
Sica就表示對攞獎抱平常心，依家專注focus喺12月頭嘅首個個人騷，每日有固定schedule練歌、練樂器，有感好似返去以前準備busking咁！佢又指最大挑戰係單人匹馬唱足2個幾鐘，自爆中間係冇嘉賓，所以每日都面對唔同嘅壓力，呢輪仲有失眠添呀！講到Sica同入圍叱咤「我最喜愛的女歌手」最後10強，佢搞笑話有少少心虛？之後會再拉票？
張明偉以樂隊Charming Way主音身份首次參加記招，首談大方認愛李麗珍個女許倚榕，佢即刻紅到面晒！女友早前幫佢拍MV，係咪收情侶價先？點慰勞女友？張明偉man爆話：「盡我能力慰勞佢！」之後會唔會情侶檔合唱？佢又搞笑話係識李麗珍在先：「覺得佢好正，之後識咗佢個女發覺仲正！」咁識講嘢，抵佢追到女神啦！
而首席營運總監馬浚偉早前被傳上任後業績麻麻，疑為做靚條數而年尾向員工「開刀」，馬浚偉否認傳聞後首現身，但就拒絕做訪問兼影單人相，就連台上大合照都冇影，話唔想搶歌手fo喎！另外，據新聞稿上表示，馬浚偉果斷廢除「分豬肉」慣例，不過據知今年獎項數目仍然係有60幾個之多！
