【viu】保錡@ERROR、程人富@小薯茄、許賢@試當真、蘇致豪@試當真、贊師父@試當真，今日現身商場為2 vs 2嘅足球賽事上演明星表演賽！許賢撻朵「的波仙人」、贊師父就自稱「游學修CP」，但保錡就謙稱未有靚朵，只希望踢場快樂足球！贊師父幽默笑話對住老細之一嘅豪哥，佢採取「保就業踢法」，係咪想笑死人？
近日油天小六生O嘴片成熱話，有唔少網紅、網絡平台跟隊「致敬」，保錡見狀爆seed斥抽水，而最快出片嘅小薯茄疑成目標！咁啱今日保錡將對富哥，雙方之間更有火花？保錡澄清冇特別影射任何對象，只係表達內心嘅說話；富哥亦表示保錡唔係講緊小薯茄，只係咁啱被cap畫面，更利申佢哋唔係抽水，只係二次創作，作用係畀小薯茄老闆睇！老闆之一嘅高Ling最近亦「瀨嘢」搞錯林家謙係外賣員，富哥爆高Ling已受內部大懲罰！
對隊「掃把星」富哥同「重炮豪」豪哥就自封「富豪隊」，踢唔嚟就用錢撻人，即刻贏咗個氣勢！賽前佢哋諗定個大絕，行動代號係「小心贊師父」，唔知實行起上嚟又點呢？而電影《公開試當真》現上映中，豪哥、許賢、贊師父又出咩招數谷票房呢？許賢話特別對一場嘅謝票場感受深刻，點解呢？
訪問後，戲肉嚟啦！明星表演賽正式開波，橙衫程人富、蘇致豪對黃衫嘅保錡、贊師父！啱啱開始分幾鐘，保錡起腳踢波後失平衡，腰間不慎撞場邊鐵欄，面露劇痛表情，但佢好快企番起身，示意ok繼續賽事，respect！留待中場休息嗰陣先冰敷處理瘀傷！
呢場明星表演賽仲勁多highlight位！第一球由保錡射入；「掃把星」富哥對鐵腳起勢擋波，有料到；豪哥踢踢吓嗌攰？「富豪隊」賽前話入一粒就當贏，最終佢哋入唔入到波？完賽比數如何？足本為大家送上！
