【Viu】大癲！ROVER出道未夠兩個月就衝出香港，噚日獲邀去台灣擔任《富邦悍將臺北大巨蛋系列戰》開球禮嘉賓，隊長Kim卓金樂、副隊長Jason Loi雷濠權、陳鎮亨同唯一隊員希晉，齊齊著上印有自己個名嘅球衣，喺處男作《秒速8公里》襯托下入場主持開球禮，首次踏足棒球場嘅ROVER用國語夾雜些少「港普」同台灣觀眾自我介紹，示範投球時都有板有眼，完成開球禮後又融入「悍將」氛圍，齊齊為愛隊吶喊打氣，超High呀！
除咗投球外，ROVER亦喺啦啦隊「Fubon Angels」東東、大頭、栗子、安娜陪同下，獻唱「富邦悍將」2024主題曲《#夠悍#GoStronger 》，仲獲4位啦啦美少女激讚好聽又Charm，極具反差萌！為咗今次演出，ROVER透露前一晚通頂練習，最難係將Band Sound融入主題曲，花咗唔少心力，感謝「Fubon Angels」嘅配合，令表演生色不少。講到第一次同啦啦隊美少女合作，身為ROVER「Bite王」嘅亨仔，梗係要爆金句，想睇ROVER有幾叻豬就睇足本訪問喇！
靜靜雞話畀大家知，ROVER今次去台灣除咗表演之外，仲會拍埋團綜，7月1 號播出，上次節目就請到神級日本AV女優河北彩伽，今次唔知又有咩驚喜呢？
