【Viu】驚慄電影《拾荒法師》今日進行開鏡拜神儀式,導演彭發率領監製陳子聰,以及一眾演員Josie何超儀、湯怡、陳家樂、阿冰@小薯茄、張文傑、新人Iman「二蚊」等現身!
Josie大爆原來彭發一直以嚟搵咗佢10次,為嘅就係拍呢部電影,卒之到今次先成事!而Josie喺戲中飾演拾荒者,面對成屋垃圾,佢笑話要出動香水先搞得掂!擔任監製嘅子聰,精神唔錯不停食燒肉,佢指雖然有戲癮,但都要等身體再好返啲先,因為身體啱啱裝咗新儀器嚟激活膀胱,所以驚成日去廁所!
而呢次Josie開戲另一重點就係力捧新人Iman,呢位外籍人士大有來頭,佢正職係一位醫生,仲要係子聰嘅隨行醫生,由美國陪同佢返嚟香港,照顧佢飲食、治療!Josie同子聰覺得Iman高大靚仔,想破例簽佢成旗下藝人,仲話要捧佢做男神!Iman指演戲對佢嚟講好大挑戰,入鄉隨俗嘅佢都學定幾句廣東話傍身!
彭發出山執導,更係佢事隔多年再寫劇本,稱係為Josie度身訂造角色!講到今次拍驚慄恐怖戲,佢話無意考慮內地市場,又指budget可觀,不過有其中一個鏡頭要使50萬,就未敢問何超儀課金!談及太太情況,彭發形容仲搏鬥緊,暫時由家人照顧,所以佢安心出嚟拍戲!
足本訪問: 陳子聰任電影監製 精神佳透露康復情況 何超儀簽老公醫生要捧紅做男神 彭發出山編劇執導 為病妻報平安