【Viu】《聽·黃凱芹2023》噚晚喺九展舉行頭場，黃凱芹設計咗一part向已故嘅顧嘉煇、張國榮、梅艷芳、Uncle Ray致敬。佢話感謝樂壇曾經擁有佢哋，先有咁出色嘅歌手同金曲。至於佢揀咗《Hero》獻畀「樂壇教父」Uncle Ray，呢首歌係黃凱芹原本諗住喺Uncle Ray 100歲慶生演唱會上唱，依家就送畀喺天上嘅對方。
完騷後受訪，講到今次四面台再加catwalk舞台嘅元素，黃凱芹畀高低台位陰到差啲仆低，好彩當時身手夠敏捷冇事！事隔半年再開騷，黃凱芹自爆今次係再「執死雞」先有得開。見到「玉女掌門人」周慧敏驚喜現身觀眾席，黃凱芹指都係騷前最後一刻先知道，又笑話見到台下fans包含老中青，跟住唱歌感覺似family，但就唔慣被後輩讚「好靚仔」。
