【Viu】COLLAR成員Marf 邱彥筒與Winka陳泳伽，今日（10日）分別推出首支個人派台單曲《~Silencio…Shh》及《一手造成》。Marf為咗跳唱快歌突破衣着界限，換上六款不同造型，騷腿露腰性感誘人，盡顯「狂野」一面，Marf表示：「今次造型上好大突破，因為會露肉，係一個好嘅嘗試，事前我專登曬黑膚色，覺得黑啲撞落呢啲衫度會好睇啲；同埋我好少着低腰褲露肚，仲要着好高高踭鞋、短裙同貼身衫，所有嘢對我嚟講都好新奇。」另外對Marf嚟講，《~Silencio…Shh》另一有意義嘅地方，係佢邀請咗一班好朋友為佢伴舞，呢班好友正正就係《全民造星IV》決賽時為她伴舞的戰友，真係別具意義！
而Winka則以鄰家女孩造型演繹愛情歌曲《一手造成》，帶出「懂得去愛另一半嗎？」嘅訊息，當中歌曲內容好多都係嚟自Winka嘅愛情故事，佢希望透過自身愛情經歷同大家分享同反省！Winka更邀請咗《全民造星V》嘅參賽者Nathan 魏念恩擔任MV男主角，二人不乏小情侶親暱場面，Winka笑稱：「我怕醜，但唔尷尬，我係面皮好厚，況且歌曲內容係自己嘅故事，所以好快投入狀態。」
Marf同Winka都係雙子座，而且又同日出歌，佢哋都自稱係Gemini Twins，實行雙子座兩面一剛一柔，為COLLAR「單飛」響頭炮！佢哋仲唔擔心同日出歌會被比較，Marf同Winka反而認為成件事好Sweet，可以一齊做宣傳，又可以多啲互動，雙方fans都可以聽到另外一位成員嘅歌，非常唔錯！
