【Viu】由女團COLLAR擔正嘅ViuTV全新節目《我哋係COLLAR》，將於下星期一晚11點首播，8位成員今日現身造勢，先大玩熱身遊戲兼互爆小秘密，原來Day係豬隊友？Winka沖涼最耐？Ivy舉止麻甩、擘大個口食嘢？相信到時節目出街仲多料爆呀！
講到8位之中邊個係女神？Ivy高票當選，但佢笑話私下零包袱，都係嘅，最近網上瘋傳佢中學時謝師宴啲相，Ivy知道咗都話冇所謂，大方話：「幾可愛呀！係肥啲啫！」原來最有包袱嗰個係Day，因為節目入面佢哋成日玩遊戲玩到大汗疊細汗，Day笑話玩到妝都溶晒好辛苦，玩乜咁激？
