【Viu】由Marf邱彥筒、Gao沈貞巧、Day許軼、Soching蘇芷晴、Candy王家晴、Winka陳泳伽、Ivy 蘇雅琳及Sumling李芯駖組成嘅女團COLLAR，成軍短短半年，噚日推出第四隻團歌《OFF/ON》。喺拍攝MV時期，COLLAR成員各自以唔同造型亮相，其中Candy浸浴造型上陣、芯駖要瞓「男友」大腿、Gao被綑綁車尾箱，而Marf就以婚紗Look示人，「之前都着過婚紗拍嘢，不過第一次戴頭紗，同埋第一次咁凝重要攞花球，我覺得呢個主題好襯我，結婚結到好納悶。」所以Marf都對結婚真係冇乜幻想喇。
為咗營造納悶氣氛，導演要求8位成員就算跳舞都要木口木面、毫無表情，Winka、Soching表示被考起，Soching話以為唔畀表情跳舞會容易啲，但原來比平時跳舞難，更容易甩step呀！MV內容講述8位成員經食吹波糖後，就好似「撻着」靈感一樣，由現實的納悶生活走進充滿幻想嘅空間。眾人一致認為Ivy食吹波膠最耍家，不過Gao就踢爆Ivy「出貓」：「人哋食兩粒吹波糖，佢食咗八粒，用八粒嚟吹。」
