【Viu】女團COLLAR成軍一周年，噚日就搞咗個盛大嘅「生日會」，8女先乘坐同新歌同名嘅「The Bright Side號」觀光巴士喺尖沙咀碼頭現身，幾百名fans已經一早霸定靚位守候，之後巴士直駛至旺角、終點站西九，期間Candy偶遇大型生日應援廣告，梗係要打卡啦！
有兩名15歲fans Tommy同Hugo勁有毅力跑足全程，直言永不放棄精神係向偶像COLLAR學習，仲搞笑套用落追女仔招數，Gao事後公開表揚二人，又笑話希望兩位fans可以加入港隊！
話晒1歲生日，又點會淨係坐完巴士、say個hi就完呀？COLLAR喺戶外地場先表演一段僅此一次嘅形體劇場，再帶嚟新歌《The Bright Side》，比喻重新出發、堅定向前。而啱啱歸隊嘅So Ching就話仲適應工作中，又透露男朋友阿Mo已經率先聽咗新歌。今次首度同樂隊RubberBand合作，佢哋興奮話每位成員都被發掘到把新嘅聲音，又對之後喺國際音樂節嘅同台演出勁期待！當然唔少得問會唔會急起直追出多啲歌？Day連真心話都講埋出嚟，就係希望公司開大水喉呀！
