【Viu】台灣超紅男團五堅情首次來港開演唱會，兩場九展騷氣氛high到爆！尾場仲要即興加嘉賓環節，喺邱鋒澤solo環節嗰陣，坐台下孖Jeremy嚟捧場嘅Edan突然搬櫈踩上台合唱《年青有為》，勁搞笑自稱係「香港追星最成功的小堅果」！而鋒澤事後亦自爆專登為Edan再改rundown，又sweet又細心！
除咗有神秘嘉賓，五堅情仲向fans大派福利，唔止送出簽名海報，喺encore環節時衝落台下同堅果們零距離接觸，臨完騷前佢哋又大贈送充滿體香同汗水嘅毛巾，真係好識冧fans喎！婁峻碩趁機宣傳5月會再嚟香港開騷，唔知到時會唔會有老友Tyson Yoshi做嘉賓呢？講到Tyson教咗一啲撩妹用語，婁峻碩即場再示範，加埋「小賴」賴晏駒句金句「打畀我」，場面爆笑！至於上月先同拍拖10年女友呼呼分手嘅陳零九，表示有慢慢調整心情，好彩身邊有兄弟陪，又話之後會趁去外國拍MV散散心。
