【Viu】Anson Lo盧瀚霆嘅新歌《MONEY》呢首歌輕鬆、funny，又好有party feel，阿撈每首歌都有個signature既手勢，佢今次仲預備咗個 #AnsonLoMoneyChallenge同神徒互動添！代表阿撈個人風格嘅仲有英文Rap，由《Megahit》開始每首跳唱歌，都係由佢親自填寫Rap詞，填詞人就做過喇唔知佢有冇打算向唱作人方面進發呢？
阿撈今次希望透過新歌，表達呢一兩年學到嘅價值觀，佢想講金錢唔係萬能，就好似佢生命中最重要嘅就係家人。入行四年幾，阿撈嘅工作排得密密麻麻，對佢嚟講Metime同瞓覺時間都好珍貴。除咗演藝工作，仲要兼顧個人品牌，有時真係忙到有氣無掟唞，神徒們都好擔心佢嘅健康，好彩阿撈開始注重養生，仲獲教母煲家傳靚湯補身添。工作咁辛苦，其實可以買啲嘢獎勵吓自己，見到兄弟相繼買樓，阿撈都話心思思想買返間dream house啊。
