【Viu】「教主」Anson Lo呢日以代言人現身飲品宣傳活動，繼續獲過千名神徒企滿4層樓舉牌力撐，邊等候教主光臨仲邊大合唱，場面哄動！教主以黄、藍配色sharp醒登場，佢話噚日一完個人品牌活動都有好好休息，之後就繼續為產品、新歌開工。
《全民造星V》如火如荼進行中，指有參賽者同教主撞樣，佢笑話未有太大留意，又謙稱未夠資格做導師，見到面嘅話都可以分享舞台tips。講到今個月24日12子齊人出活動，但Anson Lo話唔promise齊章，始終姜濤休息中，身體要緊最重要，不過佢都好希望齊人踏舞台。
另外，有指教主狂收被要求拉二胡嘅私訊，事緣上年佢同Joyce喺拉闊表演唱和音部分被笑指似二胡聲，事後疑似喺ig出story出post炮轟網民網絡欺凌，教主澄清係假嘅，雖然被惡搞，但佢大方話成件事好搞笑，又自言明白有好多進步嘅空間，特別係唱live，所以有抽時間搵老師學唱歌！
