【Viu】今年係已故巨星「哥哥」張國榮離世二十周年紀念，環球唱片將會喺3月同步推出兩張專輯《REMEMBRANCE LESLIE》、《REMEMBERING LESLIE》，重現哥哥嘅風采。前者保留哥哥珍貴嘅錄音聲軌，將多首經典金曲重新改編，其中《無心睡眠Sleepless nights Restless heart》仲係哥哥從未曝光錄音版本。
至於《REMEMBERING LESLIE》就邀請到一眾樂壇新血參與，唔同唱片公司、電視台新生代歌手破天荒攜手合作，陣容鼎盛，包括MIRROR成員Anson Lo、ERROR、P1X3L、Kira陳葦璇、Mike曾比特、電影《梅艷芳》飾演一代天后嘅王丹妮等。
Anson Lo獻聲翻唱兩首哥哥嘅經典作品《偷情》、《無心睡眠》，更親自為《偷情》填上Rap詞注入新元素。當聽到有份參與企劃嘅時候，Anson Lo喺揀歌過程中聽到《偷情》嗰陣腦海充滿舞台表演嘅畫面。
對於哥哥嘅印象，Anson Lo指對方係一個好全面同百變嘅藝人，係無可取代嘅，無論哥哥喺歌影視、舞台上嘅魅力，都具有獨特之處，係好吸引人嘅一個偶像！Anson Lo亦分享今次用新唱法演繹，用上神秘而且帶性感嘅聲線去唱；MV亦配合歌曲嘅感覺，畫面充滿神秘、迷離嘅氛圍。
