【Viu】女團COLLAR成員Day、Candy完成21日韓國旅遊節目拍攝返港，Day嘅媽媽、朋友專登帶名牌同花嚟接機，現場亦有半百fans等候。
Day同Candy大約喺凌晨12點15分由工作人員陪同步出接機大堂，見到fans即開心上前接禮物，期間又幫fans簽名，行去停車場時又不斷叫fans小心，係愛呀！佢哋都話今次個trip好開心，有好多難忘事。問到特登申請人生第一張信用卡嘅Candy有冇碌爆卡？佢笑話應該未，因為如果碌爆咗會有通知。
再問到佢哋有冇食肥咗？Candy搞笑話臨離開韓國前有最後衝刺食嘢，返港後就要即刻準備Clockenflap嘅演出。至於問到Day出trip期間有冇唔知醒？佢笑話有Candy日日做人肉鬧鐘morning call，所以都知醒。最後兩女攞滿兩手禮物，不斷同fans揮手講bye bye，Day臨上車前仲禮貌鞠躬，而fans就不停以韓文「沙冷hea唷」回話，真係好有愛呀！
