【Viu】已故一代巨星「哥哥」張國榮離世20周年，其生前經理人「陳太」陳淑芬今日開記招宣布將於4月1日，即哥哥嘅忌日喺紅館舉辦《繼續寵愛·二十年·音樂會》，席間除咗回顧過往嘅紀念活動之外，又播出紀念單曲《從未遠離》MV，內含大量哥哥嘅舊照，去到最後更有哥哥摯愛唐鶴德嘅訊息：「我們要好好的生活，才是對他（張國榮）最好的福報。」
陳太指有唐唐嘅留言已經好足夠，希望唐唐可以參與紀念音樂會，又話對方已借出哥哥多件私人珍藏喺紀念展展出。惟陳太想遲啲先公布紀念騷演出歌手名單，因為還在磋商中，提起環球邀請了一班新生代歌手如Anson Lo、男團ERROR、P1X3L等cover哥哥嘅經典金曲，可會優先考慮？佢指名單都會有新生代歌手參與。
