【Viu】保錡@ERROR同Ah Gi樊沛珈今日宣傳有份主持嘅ViuTV新節目《究食狩獵王》，保錡話拍完呢個節目對食物認識加深咗，仲話因為咁先減肥成功。而佢同Ah Gi喺鏡頭前後都不斷鬥嘴，但保錡話只係製造節目效果。而呢期勁fit嘅保錡，上星期日先輕鬆跑完渣打馬拉松10k，但佢話今年11月會再挑戰半馬賽事，果然決心突破自己。
而同場嘅Dickson余德丞就孖阿Bu陳君浩、王雍泰、黃凱逸同陳皓雲宣傳另一新節目《粉紅麻甩101》。Dickson話開工前都有少少擔心，因為對其餘4位仔仔係完全唔認識，而佢哋亦幾跳掣，好彩大家都夾到。Dickson仲話呢幾個仔仔真係好嘈。Dickson亦自爆從小到大都有咬指甲習慣，今次有機會俾佢搣甩呢個壞習慣。
