【Viu】人氣BL泰劇《黑幫少爺愛上我》一眾演員噚晚喺九展開騷，邀得香港「腐女天花板」Do姐鄭裕玲做嘉賓，除咗一圓訪問兩位男主角Mile同Apo嘅心願，Do姐仲激罕主動搲撈，揚言肯為兩子出山拍戲，係愛呀！適逢係年初十，Do姐即場派利是畀Mile同Apo，Mile仲自爆父母係Do姐Fans，所以今次同Do姐同台，自覺似周潤發同劉德華，又沾沾話媽咪一定會為佢感到驕傲！習慣早瞓嘅Do姐一場嚟到，當然把握機會自肥，除咗喺同兩位影Selfie，仲喺後台集郵，恨死現場一眾「少奶」喇！
此外，Jeff除咗自彈自唱冧歌《why don‘t you stay》外，仲自爆從小鍾意睇港產片，所以揀咗《一起走過的日子》送畀大家，廣東話真係唔錯喎！雖然Bible未能同爆醜聞嘅拍檔Build一齊表演，但跳鋼架舞時依然展現力王功架；Perth則靠扮美少女戰士成功搶鏡！
