【Viu】 MC張天賦處男紅館騷《This is MC》今晚開鑼，一開始先有段VCR，講MC唔知醒起身開騷，之後佢以紅、黑rock爆look升上台，先帶嚟兩首跳唱歌《OVERKILL》、《THIS IS MC》炒熱成個場！ 話晒都「超市KOL」，MC都有加入超級市場元素入個騷，坐住粉紅色手推車、被班女dancers推出場唱《反對無效》，呢下自抽認真抵死！MC仲帶埋當年參加《全民造星II》嘅B4 Team上台jam《Mirrors》，MC見到4位兄弟即刻彈開笑話行埋去會太矮，Jer透露B4 Team喺舞台重聚係一個承諾，原來5子曾講過邊個開騷就帶其他人上台，依家MC兌現承諾啦！ Jer之後留低追加首《MM7》添！
